太古坊的幽默感

DLLM！早上見到同事，第一句聽到的就是問候閣下的祝福語，一般「坊外」人是難以接受的。這些與別不同，既難鯁，但又親切的問候，只是漫長和艱苦一天的開始。一年365日，除了睡覺，幾乎有九成時間在工作中渡過。這樣的工時本來就很荒謬，如果工作上差一點幽默感的話，肯定未過probation就會辭職。

廣告人日日度橋，又要日日畀人ban橋。有時好橋過到個客，點知又有電視台censor、淫審處、客戶的其他部門同事、客戶老細的一眾親朋戚友，很有心有建設性但無厘頭地給予50個不能不改的comment。好好的一條橋，由storyboard到出街，經歷比戰俘更慘烈的蹂躪。如果無幽默感幫手睇開D，都幾難面對下一個job。

也可能畀人ban橋ban得多，廣告人的腦袋總是留下了為數不少的爛gag。爛gag當調劑，偶爾無妨，密集就煩爆。更過份的是爛gag當橋賣，仲出埋街。純食字廣告當然已經不值一提，隻恐龍熱氣，唔覺意個口噴火燒到同伴，有幽默感就會笑一笑，無幽默感就實藐爆。當這個世界連標鼻毛都要玩埋，仲出到街，就真係證明幽默感泛濫到震。

「超低能、勁搞笑」可以化解所有社會問題，但係唔用粗口就好難化解好多太古坊裡出現的矛盾。粗口可以「先安內，後攘外」，透過頂唔頂得順粗口的這個神奇機制，很多不適合這行發展的同事會自然地黯然離開。我們很少聽聞他們投訴同事爆粗，反而他們事後會慶幸走得早，因為不用面對大量比粗口更難頂的事情。

人生不如意的事情十常八九，每日營營役役的「坊眾」就體會最深。頂得住的，就用粗口自我發洩一番；頂唔住就索性用粗口辣著火頭，然後劉醒上身，大鬧梁非凡。鬧時鬧，當然唔會好似黎耀祥咁要就住TVB censor而吞晒D粗口。不過香港人總算仲有人性，迄今還未有爆粗反檯的片段，好似巴士阿叔條片咁在YouTube流出。

至於爆粗鬧客，就如呼吸吃飯一般，每日也發生，問題只是畀唔畀個客聽到。有時個客唔覺意聽到，就要扮時運高。廣告人見到個客扮若無其事，又要忍恨兼忍笑，如果局勢瀕臨變僵，又要幽默感上身，用爛gag轉話題，又或者再暗潤多一嘢。這種情況，在太古坊是兩台同步的，因為同一件事會在客戶和廣告公司裡同時發生。

坊內人應該慶幸，香港的情況還未算太惡劣。Samsung在英國的智能手機廣告用「HD」呢個響香港用到爛晒嘅term形容其媲美iPhone retina的AMOLED螢幕，但英國的ASA竟然裁定用字違規，大家難道還不明白香港人其實幽默地給予了廣告人很大的自由度。對於面對更多工作上無法解釋又毫不合理的事情時，大家就應該給予同樣大的包容。

因此，大家返太古坊時就不要再問以下問題了：

點解個個客都話無錢？

點解個個客都無taste？

點解個個客都無gutsy？

點解導演同photographer都收咁貴？

點解導演同photographer可以收royalty，做storyboard同layout就無得收？

點解導演同photographer D office可以咁靚？Agency就好似會計師樓咁。

點解個個客都唔畀agency做competitor生意？

點解個個客又想搵competitor嘅廣告公司嘅人做freelance？

點解間間agency都有咁多subsidiary？仲會接唔少competitor嘅生意。

點解大家樂兼職員工的時薪仲高過唔少剛剛畢業的同事？

點解太古坊間大家樂成日都咁多人？點解美心要轉出英皇道，又要上樓？

點解長毛唔去太古坊間大家樂示威？順便上嚟太古坊office示威？

點解咁多嘢做仲響度睇呢D咁無謂嘅blog？

幽默感是進駐太古坊的必備條件，很多事情何必認真？如果看完胡若藍這幾篇文章，感到有點氣結，閣下可能已具備走出太古坊的條件。至於看完得啖笑，又或者不屑一笑的，大概你還要屈就在太古坊好一段時間呢！

(走出太古坊6 / 胡若藍)